Sangka grupo it mga siyentipiko ag researchers sa U.S. ag Scotland ro nagpatigayon it pagtuon kon sa siin gintur-an nanda ro mga parrot kun paalin nga mag-video call.
Ro team it researchers nga kaibahan sa pagtuon ngara hay naghalin sa Northeastern University, The Massachusetts Institute of Technology ag The University of Glasgow.
Ro research hay may titulo nga Birds of a Feather Video-Flock Together: Design and Evaluation of an Agency-Based Parrot-to-Parrot Video-Calling System for Interspecies Ethical Enrichment.
Ro nasambit nga pagtuon hay nagatuyo nga masayuran ro social behavior it sangka alagang parrot sa anang mga kalahi nga ro gamit eamang nga komunikasyon hay sangka gadget.
Gin umpisahan ro research study sa pagturo sa 15 parrot kun paalin nga patunugon ro bell sa andang mga hawla kon gusto nanda nga maggamit it tablet para makipag-video call.
Sa screen it tablet, may nakalinya nga mga litrato it ibang pispis para pagpilian kun sin-o sa mga raya ro pwedeng maging ka-video call.
Gamit ro pantok, pagapasugtan it researcher nga magpili nga naga-isaeahanon ro sangka parrot sa kun sin-o ro gusto kara nga maka-istorya.
Suno sa researcher nga si Jennifer Cunha, nataeupangdan nanda nga maskin sa screen eang naga-istorya ro daywang pispis, ro andang pagbinatasan hay medyu una eang sanda sa kagueangan.
Nagahuni sanda sa kada isaea ag kon amat hay nagakanta.
Napamatud-an man it researchers nga may nagaka-develop nga pag-amiguhan sa mga video calls bangud nga ro kada pispis hay consistent ag sambilog eamang ro ginapili nga ka-video call.
Sa nasambit nga pagtuon, nasayuran nga makabulig ro bird-to-bird video call agud nga maprotektahan ro well-being it alagang pispis eabi eon ro mga naga isaeahanon sa andang hawla.
