Nagapanawagan si Senior Citizens Party-list Rep. Rodolfo Ordanes sa Department of the Interior and Local Government (DILG) ag Department of Health (DOH) nga magtaeana it klaru nga mga protocol agud nga masiguro ro kaeowasan it mga senior citizen nga nagapangabuhi nga naga-isaeahanon sa tunga it grabeng El Niño.
Suno kay Ordanes, nagapameligro ro mga katigueangan nga maka-eksperyensiya it pagbuyog it ueo, pagpang-euya ag iba pang baeatian tuga it dehydration, heat exhaustion ag heatstroke.
Ginsuhestiyon man nana ro uman nga pag-activate sa Barangay Health Emergency Response Teams, kapareho it mga grupong gingamit ko pandemya it COVID-19, agud nga makabulig sa mga barangay health worker sa regular nga pagmonitor sa kahimtangan it mga katigueangan.
Ginpamilit ni Ordanes nga indi eon dapat nga hueaton nga may senior citizen nga makit-an nga owa it alintro ukon kabuhi sa andang mga baeay antes nga maghueag ro mga natungdan.
Suno kana nga ro simpleng pagbisita ag pagpangamusta it mga opisyal it barangay hay pwedeng makabulig agud nga maeowas ro kabuhi it mga katigueangan nga nagapangabuhi nga naga-isaeahanon.
