KALIBO, Aklan—Magkahalong emosyon ro nabatyagan it mga senior citizens sa banwa it Kalibo sa pagtapos it pay-out it andang social pension nga nakabaton it kabilugan nga 6,000 pesos.
Suno kay Office of Senior Citizens Affairs (OSCA)-Kalibo head Aurora Ignacio nga masadya ro mga nakabaton, apang may mga lolo ag lola nga dismayado matapos nga makakas ro andang pangaean sa listahan it mga benepisyaryo.
Gindugang pa kara nga medyu imposible eon nga makaangkon it 2nd batch para sa mga owa nakabaton bangud nga patapos eon ro dag-on.
Owa man sigon sanda nakasayud kon ano ro andang magiging kapalaran sa dag-on 2020.
Nasayuran nga bumuhos ko adlaw it Miyerkules sa munisipyo ro iba pang mga senior citizens nga naduea eon sa listahan sa pageaum nga nakaangkon it 2nd batch, apang ginklaru it OSCA head nga ro distribution it social pension hay para eamang sa mga unclaimed pensions ukon mga lolo ag lola nga napas-eawan nga makahingabot sa distribution it pay-out ko nagtaliwan nga Nobyembre bangud sa nagkaeain-eain nga rason.
Uman nga ginklaru kara nga ro mga indigent senior citizens eamang ro kwalipikado nga makabaton it 500 pesos kada buean nga social pension halin sa Department of Social Welfare and Development (DSWD) sandig sa Republic Act 9994 ukon Expanded Senior Citizens Act of 2010.
