KALIBO, Aklan—Mas maabu ro single nga eaeaki kaysa sa mga babaye sa probinsiya it Aklan.
Suno kay Mr. Peter Mangilog, Statistician II it Philippine Statistics Authority ukon PSA-Aklan nga naga-abot sa 203,583 nga katawo eon makaron ro single ukon nagapabilin nga owa it asawa sa probinsiya.
Base sa datos, nagatuhaw nga mas maabu nga mga eaeaki ro owa it karelasyon kumpara sa mga babaye.
Kapin sa 113,426 ukon 55.71% ro mga eaeaking single samtang 90,157 ukon 44.29% man ro mga babaye.
Sa 17 nga banwa sa Aklan, nagatuhaw nga ro may pinakamaabu nga single ro banwa it Kalibo nga naga-abot sa 28,508.
Nagapangaywa ro banwa it ibajay nga may 18,017 ag pangatlo ro Malay nga may single population nga 18,005.
Apang kon igabase sa percentage it numero it kabilugan nga populasyon, ro banwa it Madalag ro nakalista it may pinakamaabu nga single ukon haeos 47%.
Samtang ro may pinakasangkiri nga single hay sa banwa it Lezo nga naga-abot sa 2,904.
Apang kon igabase man sa percentage it total population, ro may pinakasangkiri nga single hay sa banwa it Numancia ag Buruanga.
Nagapati si mangilog nga posibleng naga-inabu ro mga aklanon makaron nga mas ginapili nga maging single bangud nga ro iba sa mga raya hay gustong makapangasawa it taga-ibang lugar, samtang ro iba hay mas nakatutuk sa trabaho eabi eon ro mga breadwinner it pamilya ag pag-iba it andang panan-awan sa pagpangabuhi.
Samtang, ginklaru ni Mangilog ro ginbasehan it datos hay ro census nga ginpatigayon ko 2015.
Owa pa suno kana it resulta ro bag-o eamaang natapos nga census ko 2020.
Nasayuran nga sa Pilipinas hay naga seleberar man it single’s day kada Nobyembre 11.
Ginasugid nga ro single’s day hay nag-umpisa sa china ko 1990s bilang selebrasyon it mga college students nga owa it karelasyon.
