KALIBO, Aklan — Naga kumahog makaron ro mga stakeholders sa Boracay agud maayos sa mas madaling tiempo ro environmental problems sa isla.
Raya hay kasunod it pahayag ni Department of Interior and Local Government (DILG) assistant secretary Epimaco Densing III nga irekomendar it Technical Working Group nga ipaidaeum ro isla sa state of emergency bangud sa krisis.
Sa interview it Bombo Radyo Kalibo, gin pahayag ni Sangguniang Bayan member ag Boracay Foundation Incorporated (BFI) president Nenette Aguirre-Graf, unfair sa mga hotel ag resort owners nga sumunod sa kasuguan engkasong temporaryong ipasara ro isla.
Gin pahayag dugang pa kara nga pila sa mga natumod nga establishmento nga nag eabag sa environment laws hay naka-comply eon sa andang mga violations.
Madumduman nga sa kabilogan nga 51 nga establisimento, 37 eon ro nataw-an it notice of violations it Department of Environment and Natural Resources (DENR) Region 6 bangud sa kawad-an it wastewater treatment facilities ag direktang gina pilak sa dagat ro handang higku nga sangka pag eabag sa Clean Water Act.
Bilyong pisos sigon ro maduea ag maabong magutman kamana man it mawad-an it trabaho engkasong eubusang ipasara ro bug-os nga isla.
