KALIBO, Aklan—Bangud sa waea-tuo nga pagtaas sa presyo it produktong petrolyo sa nasyon, apektado man makaron ro pangabuhian it mga maisot nga negosyante kapareho it mga food cart ag street food vendor.
Suno kay Romulo Inosanto, medyo nalisdan sanda sa owa it pundo nga pagsipa sa presyo it petrolyo kung siin apektado man ro pilang ka mga baeak-eon.
Batyag eon sigon nanda ro epekto it pagtaas sa presyo it LPG nga sambilog sa nagapangunang ginagamit nanda sa pag-eaha it ginabaligya nga streetfood.
Maskin sigon ro mantika, plastic ag pilang panakot hay nagtaas man rason nga nabudlayan sanda nga eagson ro andang kita.
Sa pihak kara, owa sigon sanda nagpatuman it pagtaas sa presyo it streetfood ag sa baylo hay nakaangkon eon lang it adjustment sa size kara para indi eon maapektuhan ro mga bumaeakae.
Sa pihak nga parte, ginpaathag ni Dimson Pormon nga medyo naging matumal ro andnag kita umpisa nga ginbutang sanda it lokal nga gobyerno sa Veteranz Street halin sa dating pwesto sa sueod it Kalibo Pastra Park.
Suno kana, mas maabu nga tawo ro nagadagsa sa andang mga cart kat idtu pa sanda nakaplastar sa plaza kung igakumpara sa ginakahimtangan nanda makaron.
Apang, positibo man sanda nga maging mabaskog ro andang pagbaligya bangud sa amat-amat nga paghaeuga it gobyerno sa mga ginapatuman nga restrictions.
