KALIBO, Aklan—Bangud sa sigidas nga pagtinaas sa presyo it produktong petrolyo sa nasyon ag ro domino effect kara sa mga nagapangunang baeak-eon, naga-aray eon man ro mga maisot nga negosyante kapareho it karinderya.
Suno kay Marilou Aranilla, tag-ana it sangka karinderya sa bahin it Kalibo Shopping Center nga batyag eon nanda ro grabeng epekto it pagtaas it mga nagapangunang produkto sa nasyon.
Suno kana, maskin nga ginhaeugaan eon ro restriction sa probinsya it Aklan matapos nga paeawigon ro Alert level 1 status, nagapabilin gihapon nga sangkiri ro mga nagaguwa nga tawo.
Sambilog pa sa nagapalisod sa kahimtangan it kapareho nana nga tag-ana it karinderya ro masyadong mataas nga presyo it mantika ag Liquefied Petroleum Gas (LPG) nga makaron hay nagabalor eon it masobra P1,200 ro kada tangke.
Bangud kara, nagdesisyon sigon sanda nga magpataas it tig limang piso sa kada order para maeagas ro andang kapital ag pang bayad sa mga tawuhan ag iba pang baeayran.
