KALIBO, Aklan—Kasunod it pag-extend it Modified Enhanced Community Quarantine ukon MECQ sa probinsiya it Aklan hasta sa Setyembre 7, puno it pagpasaeamat ro mga nagdaeaog sa ika-an-um nga domingo nga draw it “Enhanced Swerte sa Palengke 2021 promo balde-baldeng pa-premyo na, may cash pa” matapos nga ma-claim ro andang natungdan nga mga premyo nga ginaeakipan it cash prize ag gift pack.
Ginsaysay it mga tagdaog nga sa tunga it kalisod tuga it COVID-19 pandemic, mabahoe nga bulig para kanda ro nabaton nga cash prizes agud nga ibakae it mga kinahangeanon sa sueod it baeay ag pangbayad utang.
Sa send-in entries, nabaton eon ni Leny Serillo, 48 anyos it barangay Estancia, Kalibo ro anang nadag-an nga 5,000 pesos nga cash nga imaw mismo ro naghuyap ag gift pack nga nagabalor it 500 pesos nga nakasueod sa balde it orocan.
Sa pihak nga parte, malipayon man ro 2nd prize winner nga si Claridel Macahilig, 43 anyos it barangay Calimbajan, Makato sa anang pagbaton it 4,000 pesos nga premyo bangud nga may pangbakae eon imaw it dugang nga kinahangeanon sa sueod it baeay.
Kadungan kara, gin engganyo nana ro iba pang tagpaeamati it Bombo Radyo Kalibo nga magpadaea man it mga entries agud nga makaangkon it chansang magdaog.
Samtang, ginpasaeamatan man it 3rd prize winner nga si Resa Gen Autencio, 32 anyos it barangay Sta. Cruz, Lezo ro nabaton nga 3,000 pesos nga premyo.
Mabahoe nga bulig suno kana ro promo it bombo radyo philippines sa tunga it malisod nga pagpangabuhi tuga it COVID-19 pandemic.
Sa pihak nga parte, na-claim man it mga online activation winners sa Enhanced Swerte sa Palengke 2021 promo ro andang nadag-an nga mga premyo.
Nabaton eon it major prize winner nga si Ailene Tambong it Purok 2 C. Laserna St., Kalibo it 3 A’s Store ro anang 3,000 pesos nga premyo ag 1,000 pesos nga balor it gift pack nga nakasueod sa balde it orocan.
Samtang, pareho man nga nagbaton it tig-1,500 pesos nga cash ag 1,000 pesos nga balor it gift pack ro consolation prize winners nga sanday, Evelyn Victoriano it Purok 2 C. Laserna St., Kalibo it Nenengs Sari-Sari Store; Kate Dela Cruz it Poblacion, Kalibo it Kate’s Store ag Merly Honrado it barangay Libas, Banga it Merly’s Store.
