KALIBO, Aklan — Dapat nga maimbestigahan kon sin-o ro mga opisyal it gobyerno nga sa likod it pag-eskapo sa nasyon ni dismissed Bamban, Tarlac Mayor Alice Guo.
Suno kay dating provincial board member ag political analyst sa Aklan nga si Atty. Harry Sucgang nga sangka mabahoe eon man raya nga kwestiyon sa integridad it sistema it katarungan ag seguridad it nasyon bangud nga nakaguwa si Guo it Pilipinas maskin nga may ginpaguwa kontra kana nga hold departure order .
Nauna eon nga ginpahayag ni Senador Risa Hontiveros nga base sa mga dokumentong ginpasa kana, ko gabi-i it Hulyo 17 pa nakaguwa it Pilipinas si Guo ag nag-agto sa Kuala Lumpur Malaysia gamit ro anang Philippine passport.
Raya hay sa pihak it ginapangatubang nga mabahoe nga krimen .
Suno kay Atty. Sucgang nga ro makarondaya nga sitwasyon hay nagiging rason it pagduda sa ikasarang it natungdan nga ahensiya it gobyerno nga baeabagan ro mga kilaeang personalidad nga may ginapangatubang nga kaso sa nasyon .
Nagapati man si Atty. Sucgang nga mga maimpluwensiyadong tawo ro nagbulig kay Guo nga posibleng nabuligan man nana ko nagtaliwan nga eleksyon bangud sa anang kwarta.
Ginbuligan sigon imaw nga makaguwa it nasyon agud nga indi eon makasugid kun sa siin siguradong maabu nga tawo ro madaeahig nga may kahilabtanan sa anang mga kaso.
Kapareho it nakasanayan sa Pilipinas, mabahoe ro posibilidad nga maeubong eon man sa lipat ro kaso ni Guo .
Nauna eon nga nag-atubang sa Senate hearing si Guo matapos madaeahig sa gin-raid nga POGO hub sa Bamban, Tarlac, nga hugut nga ginpamalibaran it dating alkalde.
Mag-eowas kara, naging kuwestiyonable man sa Senado ro matuod nga identity ni Guo.
Samtang, uman nga ginsuhestiyon ni Atty. Sucgang nga ituro sa elementary pa eang ro maeain nga epekto it korapsyon sa pageaum nga mabag-o ro bulok nga kalakaran sa Pilipinas.
