KALIBO, Aklan — Ginpamaliaran ko pamunuan it Caticlan jetty port nga may ginapatuman sandang “no Comelec ID, no entry” sa mga empleyado sa Isla it Boracay.
Suno kay Jetty port administrator Nieven Maquirang nga may gintaeana sandang separadong daean para sa mga workers, kon siin mismong company ID ag terminal pass ro andang ginasikyar.
Sa makaron sigon hay ro mga trabahador it compliant hotels and resorts ro ginapasugtang makasueod sa isla.
Samtang, obligado gihapon ro mga residente nga magpakita it valid government ID antes makasueod sa Boracay agud pamatud-an ro andang pagiging residente.
Nauna eon nga ginhambae it pilang negosyante nga mabudlay makaron nga makausoy it mga empleyado bangud sa waea-tuo nga mga requirements ag manabang sweldo.
Mag-eowas kara, doble ro andang gastos bangud uwa eon ginapasugtan ro mga boarding house ag staff house sa isla ag kinahang-ean nga sa mainland Malay sanda maga-istar.
Padayon pa sigon nga ginaistudyuhan it inter-agency task force ro ginaproponer nga access bracelet agud ma-monitor ro mga turistang nagasueod.
