NATIONAL News — Maga-umpisa makaron nga dag-on ro pagsaka sa sweldo it mga trabahador it gobyerno, suno sa Department of Budget and Management (DBM).
Ginpahayag ni DBM. Sec. Amenah Pangandaman sa Palace briefing nga gintaeana eon ro P70 billion sa ginaduso nga budget sa 2025 para sa una nga tranche it ‘salary increase’.
“Gusto po natin simulan na this year iyong first tranche ng ating salary increase,” ginpahayag ni Pangandaman.
Kadungan kara, anang ginpaathag nga ro pagtaas it sweldo hay magapadayon hasta sa 2027.
“So, iyon po four tranches hanggang 2027, and as of now po, we are perfecting the executive order po and we are hoping for the issuance of the executive order soon po,” pahayag dugang.
Ginkumpirma man ni Pangandaman nga ro pagtaas hay iga-apply it retroactive umpisa Enero 2024.
Namitlang sa ika-tatlo nga State of the Nation Address (SONA) ni Pres. Ferdinand ‘’Bongbong’’ Marcos Jr. ro pag-anunsyo kara angot sa pagpataas sa sweldo para sa government employees nga igaplastar pinaagi sa ap-at nga tranche.
Samtang, ginpahayag man ni Pangandaman nga may una nga P9.6 billion nga gintigana nga pondo para sa medical allowances it government workers.
Ginpahayag man ni Pangandaman nga P7,000 ro medical allowance sa subsidy nga igatau sa kada empleyado it gobyerno kada dag-on umpisa sa 2025.
