KALIBO, Aklan—Haeos tanan nga mga transport cooperative sa bilog nga probinsiya it Aklan hay indi magabuylog sa panawagan it ibang grupo nga magpatigayon it untat-biyahe sa adlaw it State of the Nation Address ukon SONA ni Pangueong Ferdinand Marcos, Jr. nga magabuhay it tatlong adlaw.
Suno kay Edgar Igcasenza, chairman it Malinao-Lezo Transport Cooperative nga kaeabanan sa mga nagaduso it transport strike hay kontra sa jeepney modernization partikular ro nagahilapit nga phaseout it mga tradisyunal nga jeepney.
Tanan sigon nga operator it public utility jeepney sa Aklan hay miyembro it rehistradong transport cooperative nga nagakontra sa mga transport strike.
Sa pihak kara, gin abisuhan sigon sanda it Land Transportation Franchising and Regulatory Board ukon LTFRB nga owa ginabawaean ro sin-o man nga transport group nga mag welga bangud nga kinamatarung it mga raya nga magpatigayon it protesta agud nga maipabutyag ro andang sentimiento sa gobyerno ag publiko.
Dugang pa ni igcazensa nga suportado nanda ro anuman nga plano it gobyerno para sa jeepney modernization.
Sa Aklan hay owa eon sigon it problema sa consolidation it tanan nga mga PUJs sa kooperatiba, apang ro kawad-an it local public transport route planning ukon LTPRP ro sabeag kanda sa pagpatigayon it loan sa Landbank ag Development Bank of the Philippines ukon DBP.
May kinahangean pa sigon nga ayuson sa ginsumite nga LTPRP it provincial government rason nga ginbalik raya it LTFRB.
