KALIBO, Aklan—Ginakabig it lokal nga gobyerno it Kalibo nga madinaeag-on ro mga event nga ginpatigayon sa unang adlaw it Opening Salvo ukon sneak preview para sa selebrasyon it 2025 Ati-Atihan festival sa banwa it Kalibo.
Suno kay Jay-ar Arante, head it media affairs it LGU-Kalibo nga maskin nga maueanon hay gindumog it mga tawo ro ginuman fest sa Kalibo pastrana park kun sa siin naging dinapit nga bisita ro singer nga si Nik Makino nga nagpasikat sa kantang “Moon”.
Raya hay ginsundan it “1st Mayor Juris B. Sucro Hala BiRun Marathon” para sa mga bagito ag seasoned runners nga halin sa nagkaeain-eain nga parte it nasyon.
Dugang pa ni Arante nga pagkatapos it ginpatigayon nga misa sa Kalibo Cathedral hay ginhiwat ro blessing it bag-ong stage it Kalibo Pastrana Park ag Children’s playground.
Libu-libo nga mga drummers halin sa kapin sa 85 nga tribu ag grupo ro nagpasundayag.
Ro sadsad ukon street dancing hay nagtapos sa Kalibo Pastrana Park.
Sa pinaka-highlight it selebrasyon nga maga-umpisa alas-6:00 it gabi-i, igadeklara ro Opening Salvo nga pagapangunahan ni mayor Juris Sucro.
Raya hay pagasundan it fireworks display.
Samtang, ginpahayag ni Arante nga kapin sa 200 nga kapulisan ag force multipliers ro gin deploy para sa makaron nga adlaw nga event agud nga masiguro ro peace and order nga may dugang nga pwersa halin sa Aklan Police Provincial Office ag Bureau of Fire Protection.
May mga naka standby man nga medical teams para sa anuman nga major untoward incident.
Madumduman nga target it kapulisan nga makaangkon it “no major crime incidents” sa selebrasyon .
Maga-perform hindunang gabi-i ro singer nga si Yeng Constantino ag aktor nga si Tom Rodriquez.
Magiging dinapit nga bisita si senador Imee Marcos ag partylist rep. Jojo Ang.
Samtang, hin-aga nga adlaw it domingo, ro pormal nga pagpakilaea sa 18 nga mga kandidata it Binibini ng Kalibo Ati-Atihan ag pagtukar it mga lokal nga banda ag artists ro magapasadya sa ika-3rd day it Opening Salvo celebration.
