KALIBO, AKlan—Batyag eon it mga miyembro it BATODA ro epekto it sigidas nga pagtinaas it presyo it produktong petrolyo sa nasyon.
Suno kay Jessy Rosales, sambilog sa mga miyembro it BATODA nga dobleng pasakit sa kapareho nana nga driver ro masyadong mataas nga presyo it langis ag dugangan pa it maeaka nga numero it mga pasahero.
Kaeabanan sigon nga naga-avergae eamang it hasta ap-at nga round trip ro andang mahimo kada biyahe bangud sa kawad-an it mga pasahero tuga it ginapatuman nga quarantine restrictions.
Nasayuran nga P40 ro andang sukot nga pamasahe sa kada pasahero halin Poblacion, Banga paadto it Eastern Terminal sa banwa it Kalibo vice versa.
Naga-apela man raya sa mga natungdan nga madugangan it sambilog ro pwede nandang maisakay nga pasahero agud nga maskin paalin hay kumita man sanda.
Aminado si Rosales nga sakto eang nga pang intriga sa boundary ro andang kita ag haeos owa eon it sobrang mai-uli para sa pamilya.
Nagaeaum man imaw nga mataw-an it nagakaigo nga igtueopangod ro tanan nga una sa sektor it transportasyon bangud sambilog sanda sa grabeng naapektuhan it pandemya.
