KALIBO, Aklan–Padayun nga naga-aray ro mga tricycle driver kasunod it pagtinaas sa presyo it produktong petrolyo ko mga nagtaliwan nga dominggo tuga it kinagamo sa tunga it Russia ag Ukraine.
Suno kay Romeo Palmon, Presidente it BULCAMPUS Tricycle and Driver’s Association nga kaabuan sa anang mga miyembro hay naga-antus eon it grabeng kalisod tuga it kawad-an it ginakita sa pagpasada.
Ro mas makaeueu-oy suno kana hay ro mga driver nga naga-boundary pa it ginabiyahe nga tricycle kung siin ro iba kanda hay haeos owa eon it mai-uli para sa andang pamilya.
Nagapabilin man sigon nga maeanghay ro pasahero apisar nga ginpasugtan eon ro full seating capacity sa pampublikong transportasyon sa mga lugar nga ginpaidaeom sa alert level 1.
Kaeabanan sigon nga naga-average sanda it hasta tatlong trip kada adlaw.
Sa pihak kara, nagpasaeamat man si Palmon sa ginpatuman nga oil price rollback it mga kompaniya it langis umpisa ko adlaw it Martes.
Nagaeaum sigon sanda nga magpadayun eon ro pagnaba it presyo it petrolyo sa nasyon.
