KALIBO, Aklan—Nagbaton it 3,000 pesos nga bulig pinansyal ag food packs nga ginakaeakipan it 5 kilo nga bugas, 5 sardinas ag 5 noodles ukon canton ro kada tricycle drivers sa aklan halin sa lokal nga gobyerno it probinsiya.
Raya hay ginpangunahan it Provincial Social Welfare and Development Office ukon PSWDO.
Ro mga kwalipikadong benepisyaryo hay ro mga owa nakabaton it Social Amelioration Program ukon SAP it DSWD ag bukon it miyembro it Pantawid Pamilyang Pilipino Program ukon 4P’s.
Ginasugid nga masobra sa 1,300 nga drivers ro nagbaton it ayuda kahapon halin sa an-um nga banwa nga ginpatigayon sa Provincial Capitol.
Raya hay ginaeakipan it Batan, Makato, Tangalan, New Washington, Banga ag Numancia.
Makaron nga adlaw it biyernes hay ro banwa it Kalibo ag Ibajay ro nakataeana nga magabaton it benepisyo.
Nakaangkon it kanya-kanyang schedule ag oras ro kada banwa agud nga mapabilin ro kaeowasan it kada isaea ag mapabilin ro social distancing sa pagtau it ayuda.
Samtang, sa interview it Bombo Radyo, ginpahayag ni PSWDO head Evangeline Gallega nga naging smooth ro kabilugan nga pagpanudpod it ayuda sa mga tricycle drivers.
Raya hay bangud ro tanan hay nakasayod sa andang dapat nga himuon makarun nga tyempo it pandemya.
Nagpasaeamat man raya bangud nga owa nagdo-eotdutan ro mga tawo kung sa siin sa entrance pa eamang hay naga-obserba eun it sang metro nga distansiya sa kada isaea.
Hugot man nga ginapatuman ro “No face mask no entry” ag “one entrace one exit policy”.
Antes nga makasueod sa venue hay ginaboe-an ro mga drivers it body temperature ag gina-sanitize.
Gina-usuyan eamang ro mga drivers it photo copy it andang lisensiya.
Ro mga TODA president ro nagpasa it listahan sa andang natungdan nga MSWDO nga ginpaidaeum sa screening antes nga ginsumite sa PSWDO.
Nasayuran nga matapos gindeklara ro general community quarantine sa aklan, uman nga ginbuksan ro operasyon it mga pampublikong transportasyon kaibahan ro pagbalik pasada it mga tricycle.
Apang daywang pasahero eang ro ginapasugtan sa kada biyahe.
Pila sa mga pagbag-o sa pagbiyahe hay ro pagbutang it plastic cover sa tunga it pasahero ag driver ag hugut nga pagsuksok it face mask.
Samtang, ginpahayag it pilang kamga tricycle drivers nga ro andang nabaton nga ayuda hay makatau it mabahoe nga bulig eabi pa ag limitado makaron ro andang pagbiyahe bangud sa paeag it coronavirus disease ukon COVID-19.
Apang, ginsuhestiyon ni Mr. Hernani Igong-igong sambilog sa mga presidente it drivers and operators association it Numancia nga bahala eon nga mag istorya ro driver ag operator sa mabaton nga ayuda bangud nga ro cash assistance hay nakapangaean sa operator ag bukon it sa driver.
