KALIBO, Aklan—Kadungan it dry run sa ginaduso nga re-routing scheme sa banwa it Kalibo, nagpatigayon man it hub-eag protesta ro pilang mga tricycle drivers ag operators sa prente it Magsaysay park agud nga kwestiyunon ro nasambit nga tikang.
Suno sa pilang mga drivers ag operators nga kinahangean nga maintindihan it mga taga-munisipyo it Kalibo ro andang kahimtangan bangud sa naexperiensiyahan makaron nga covid 19 pandemic kun sa siin hay masyadong mahina sigon ro andang kita ag nagatipid ro tanan.
Pagapatyon sigon kara ro andang pangabuhian bangud nga owa man it posibleng ma-pick-up nga pasahero sa rota nga gintaeana para kanda.
Nabudlayan man ro ibang drivers nga indi eon makasueod sa pinakasentro it banwa it kalibo bangud nga indi eon sigon nanda masueang ro naga arkila kanda.
Reklamo man it sambilog nga kinahangean pa it miyembro it anang pamilya nga magsakay it panibag-ong tricycle bangud nga indi eon nana raya mahatud sa anang gina-obrahan.
Sa pihak nga parte, nataeupangdan man nga naduea eon ro physical distancing sa ginpatigayon nga protesta bangud sa kaabuon it mga nagpasakop.
Nasayuran nga gina-engganyo it mga nagawelda ro iba pa nanda nga mga kaibahan nga drivers nga padayun nga nagabiyahe sa kutob sa mga naga agi sa nasambit nga lugar.
Samtang, ginpahayag man it sambilog pang tricycle operator nga kabaliktaran ro andang ginapatuman nga re-routing sa nauna nanda nga gin-istoryahan sa ginpatigayon nga public hearing.
