KALIBO, Aklan — Nakalista eon it booking cancellations ro pilang mga mabahoe nga hotel ag resort maghalin sa mga turistang nagpatiagyun it reservation agud makisadya konta sa bantog nga LaBoracay.
Gin kumpirma ni Malay executive assistant to the mayor Rowen Aguirre nga bisan ro mga corporate sponsors it nasambitang event hay nag-back out eon bangud sa nakataeanang pagpasara sa isla.
Raya hay kasunod it pahayag ni Pangueong Rodrigo Duterte nga owa sin-o man ro makapugong kana agud magdeklara it state of calamity ag magpasara sa Boracay sa darating na Abril 26, 2018 nga tiempong peak season sa isla.
Gina dayo it haeos 40,000 nga mga turista, mapa-lokal man ukon estranghero ro “Laboracay” nga gina panipuslan ro long weekend kada May 1 holiday nga Labor Day.
Madumduman nga nauna eon nga gin rekomendar ni Aklan Governor Florencio Miraflores sa LGU-Malay ro pagkansela sa event agud taw-an it daean ro rehabilitasyon.
Aminado ro lokal nga gobyerno it Aklan nga bilyones pisos ro maduea maghalin sa kita it industriya it bangud sa nasambitang plano.
Samtang, padayun nga gina kumbinyu ni Aguirre ro mga bakasyunista nga pwede pang mag agto makaron nga Semana Santa bangud bukas pa ro isla sa pagbaton it mga turista.
