KALIBO, Aklan — Buhos eon ro mga turista sa Isla it Boracay bangud sa long weekend tuga it pagdumdum sa All Saints ag All Souls Day.
Suno kay Kathrine Licerio, tagapaghambae it Municipal Tourism Office it LGU-Malay nga umpisa ko adlaw it Huwebes hay masako eon ro mga pantalan pasueod ag paguwa it isla.
Mag-eowas sa mga nagabakasyon nga mga turista, kaibahan sa nagdagsa sa Caticlan jetty port ag Tabon port hay ro mga empleyado nga nagtinguha nga maka uli sa andang natungdan nga mga lugar agud nga idtu iselebrar ro Pista Minatay.
Sa pihak nga parte, may kanya-kanya man gimik suno kana ro mga bars ag iba pang mga establisimento kapareho it pagpatigayon waea-tuo nga mga Halloween parties agud nga maka-engganyo it mga bisita.
Sa datos it Malay Tourism Office, naga-abot eon sa masobra sa 138,943 ro numero it mga turista nga nagbakasyon umpisa Oktubre 1 hasta 30 kun sa siin naga-average it 5,000 hasta 6,000 ro daily tourist arrivals.
Umpisa Enero hasta Oktubre, nakalista it kabilugan nga 1.8 milyon nga turista nga nagbisita sa Boracay nga maeapit eon lang sa andang gina-target nga 2.1 milyon hasta sa pagkatapos it makaron nga dag-on.
Sa pihak nga parte, naging madinaeag-on suno kana ro pag patigayon it bag-o eamang natapos nga Boracay White Beach Festival 2024 sa pihak it pag-agi it bagyong Kristine ag Leon kun sa siin pila sa mga aktibidad hay owa napatigayon bangud sa mabaskog nga uean ag hangin.
Bangud nga long weekend, ginaeauman it nasambit nga taeatapan nga magadere-deretso pa ro pag-aeabutan it mga bisita hasta sa domingo nga adlaw.
Ginpasiguro man sigon it Malay Municipal Police Station ro hugut nga seguridad sa Boracay ag bilog nga banwa it Malay agud nga masiguro ro kaeowasan it mga bakasyunista ag mga biyahero .
