Mainit nga ginsug-aeaw it Department of Tourism ag mga opisyal it provincial government ag lokal nga gobyerno it kalibo ro haeos 187 nga Chinese Nationals nga halin sa Changsha, China nga nag-abot ko nagtaliwan nga adlaw it Biyernes , abril 28 sa Kalibo International Airport.
Raya ro unang batch it mga Chinese tourists nga nag abot sa aklan matapos nga uman nga buksan it china ro border it nasyon para sa outbound group travel matapos isarado ko 2020 bangud sa COVID-19 pandemic.
Sakay ro mga raya it OK Air ag magabakasyon sa isla it Boracay.
Suno kay Engr. John William Fuerte, manager it Civil Aviation Authority of the Philippines ukon CAAP-Aklan nga ro nasambit nga airline company hay may tatlong flight kada domingo.
Pagaeauman pa suno kana nga may iba pang mga direct flights halin sa China ro magatugpa sa paeuparan sa masunod nga mga inadlaw.
Kaibahan kara ro Air Busan halin sa Incheon, South Korea ko Mayo 3; sa Hunyo ro AirAsia halin sa Incheon, may una man nga halin sa Taipei ag Pudong, China.
Nagsumite man it proposal ro Philippine airlines nga magabalik sa Hunyo halin sa Beijing paagto sa Kalibo.
Mabahoe nga bulig sigon sa ekonomiya it nasyon ro uman nga pagbalik it mga turista halin sa China.
Ginpangunahan it DOT ag mga opisyal ro pagpanupod it mga token ag freebies sa mga turista.
Gin-abi-abi man ro mga raya it ati-atihan tribe sa mismong arrival lobby kun sa siin todo enjoy ro mga turista sa pagpa-picture sa mga ati-atihan warriors.
Malipayon man ro mga nag-aeabuitan nga mga Chinese national nga uman nga nakapagbakasyon sa Pilipinas partikular sa bantog nga isla it Boracay.
