KALIBO, Aklan—Nagaeaum si Malay mayor Frolibar Bautista nga mapasugtan ro hinyu it lokal nga gobyerno it Aklan nga i-exempt halin sa swab test ro mga turistang taga-Western Visayas nga plano nga magbakasyon sa isla it Boracay.
Suno sa alkalde nga owa man it travel restrictions sa sueod it Western Visayas.
Mag-eowas kara, mas gusto sigon it mga negosyante ro antigen test bilang requirements sa mga turista antes nga makasueod sa isla, apang bangud nga pumalpak ro pilot testing kara sa baguio city hay nagahueat sanda it panibag-ong laygay halin sa national government.
Umpisa nga buksan suno kana ro boracay sa mga turista halin sa iba pa nga parte it nasyon ko Oktubre 1 hay nagapabilin nga manaba ro tourist arrival.
Kaabuan sigon sa mga bisita hay nagkansela it andang bookings bangud nga mag-eowas nga medyu mahae hay mabudlay man nga makabo-oe it swab test, kun sa siin obligado ro mga raya nga magpakita it negatibong resulta 48 oras antes ro pagbiyahe.
Nauna eon nga ginpahayag ni Provincial Administrator Atty. Selwyn Ibarreta nga pagkatapos it Oktubre 15 nga assessment sa ginpatigayon nga Boracay re-opening hay pagahinyuon nanda sa Department of Tourism ag National Inter-Agency Task Force (IATF) nga boe-on eon ro negative RT-PCR test requirement sa mga turista halin sa kaiping nga probinsya sa rehiyon.
