KALIBO, Aklan — Gusto it sangka konsehal nga imbestigahan it inter-agency task force ro ina sugid nga iligal nga pagpasueod it mga turista sa Boracay sa kasagsagan it naga padayun nga paglimpiyo ag rehabilitasyon sa isla.
Sa interview itBombo Radyo, gin pahayag ni Malay Sangguniang Bayan member ag sambilog sa mga miyembro it Boracay Foundation Incorporated (BFI) Nenette Aguirre-Graf nga may naispatan sandang mga turista nga nakakaeusot gamit ro gina sugid nga mga company ID nga gina tao eamang sa mga empleyado it mga hotels ag resorts agud hilway nga makagowa ag makasueod sa isla.
Gin pamatud-an sigon it pilang resort owners ag managers nga may mga turistang naka-check-in eon kanda.
Sa idaeum it guidelines sa Boracay closure, owa gina pasugtang makasueod sa isla ro mga turista ag paga baeabagan sa jetty port pa eamang.
Sa pihak nga parte, aminado si Caticlan jetty port administrator Nieven Maquirang nga medyu owa nag agi sa naga kaigong validation ag screening process ro pag-isyu it ID sa mga residente ag trabahador sa Boracay.
Kaabuan sigon sa mga raya hay na-isyuhan it ID it natungdan nga barangay apisar nga owa pa personal nga naga apply.
