KALIBO, Aklan—Gin-engganyo it Boracay Foundation Incorporated (BFI), grupo it mga negosyante sa isla nga tempranong magpa-book ro mga turista.
Suno kay Edwin Raymundo, presidente it BFI, ginkumbinyo sanda ni Tourism Secretary Bernadette Romulo-Puyat ro mga accommodation establishments nga magsumite it letter of intent to operate.
Apang sa kabilugan nga 390 accredited establishments sa Boracay hay 98 pa eamang ro nakasumite it letter of intent sa lokal nga gobyerno it Malay.
Ro mga accommodation establishments kapareho it mga hotels, resorts ag mga restaurants nga may dine-in, take-out ukon delivery services hay kinahangean nga magbo-oe anay it Certificate of Authority sa DoT-Region 6 antes nga pasugtan nga makapagbukas.
Dugang pa ni Raymundo nga owa sanda it plano nga magdugang it sukot sa mga hotel rooms, apang hugut nga igapatuman sa sangka kwarto hay daywang katawo eamang ro pagapasugtan.
Mag-eowas sa sanitizing kits nga igatau sa kada turista, magabutang man sanda it trash bin para sa bio hazard, kun sa siin, dikara igabutang ro mga nagamit nga personal protective equipment (PPE) it mga bisita kapareho it face shield, face mask ag iba pa.
Gindugang pa kara nga pabor man sigon si sec puyat nga makaangkon it buffet ro mga hotels , apang hugut nga bantayan ro social distancing.
Mas gusto sigon nanda ro ala carte (ala kart) ukon pag-order it pagkaon halin sa menu.
Ro Boracay ro kauna-unahang island destination nga uman nga magabukas sa turismo, kun sa siin, umpisa Hunyo 16 hay pagapasugtan eon nga makasueod ro mga turista halin sa Western Visayas.
