KALIBO, Aklan—Ginkumpirma ni Provincial Administrator Atty. Selwyn Ibaretta nga nakaangkon it aberya ro andang sistema ko Nobyembre 16 rason nga na-stranded ro pilang mga turista sa Ninoy Aquino International Airport (NAIA).
Suno kana, may bastante eon sanda nga mga validators agud nga magbaton it mga tourist applications.
Sa makaron, naga-abot sa 1,000 hasta 1,500 ro aplikasyon nga gina-proseso it provincial government kada adlaw para sa QR code.
Nauna kara, pilang mga turista ro nag-alburuto matapos nga owa naka-eagas sa tagsa-tagsa ka mga flight bangud sa kapas-eawan nga makabuoe it required nga QR codes sa tamang oras.
Kadungan it pagbuoe sa RT-PCR test sa mga travel requirements sa mga fully vaccinated nga mga turista, bumuhos ro mga bisita ko Lunes sa Boracay.
Angot kara, gin-abisuhan ni Atty. Ibaretta ro mga turista nga tempranuhan ro pagsumite it aplikasyon para sa QR codes ukon 24 oras antes ro andang flight para iwas-aberya.
Base sa record it Malay Tourism Office, halin Nobyembre 1 hasta 14, ro tourist arrivals hay naga-abot eon sa 24,355, kung siin kaabuan kara hay halin sa National Capital Region (NCR).
