KALIBO, Aklan—Kasunod it nagapadayon nga epekto it pagpanaeasa it coronavirus disease ukon Covid-19 sa bilog nga kalibutan, maabo gihapon nga mga sikat ag kilaeang negosyo sa isla it Boracay ro nagapabilin nga sarado ag uwa pa nakabalik sa andang operasyon bangud sa kawad-an it mga bisita ag turista nga mas eabi pang nagpalugmok sa andang pangabuhian.
Apisar nga ginbuksan eon ro Boracay para sa mga domestic tourist, sangkiri gihapon ro nagapangahas nga magbakasyon sa malaparaisong isla bangud sa kahadlok nga matapnan it deadly virus.
Nasayuran nga maabo eon nga mga turista ro naarestong nagpameke it andang reverse transcription -polymerase chain reaction ukon RT-PCR test result para eamang makalusot sa strikto ag hugot nga pagbantay sa entrance pasueod sa Boracay.
Ro nasambit nga mga turista hay ginkasuhan it mga awtoridad bangud ro iba sa mga raya hay nadiskubrehan nga positibo sa deadly virus matapos nga ginpaidaeom sa swab test nga ginpatigayon it Aklan Provincial Health Office ag ginpaexamine sa DRSTMH molecular laboratory.
