Masobra sa 100 ka mga unit it motorsiklo, tricycle ag saeakyan nga nagabyahe sa mga karsadahon sa isla it Boracay ro naaprehend it mga otoridad sa nagapadayon nga random checkpoint it Malay Municipal Police Station.
Suno kay P/Lt.Col. Don Dicksie De Dios, hepe it Malay PNP Station nga ro andang operasyon hay sandig sa ordinansa nga ginapatuman it lokal nga gobyerno.
Ro mga behikulo nga naaprehend it pulisya kaibahan ro Municipal Traffic and Regulatory Office sa isla it Boracay hay nag-eabag sa Article 18 it Municipal Traffic Code ‘Special Permit to Transport Vehicles sa isla.
Ginpahayag dugang ni De Dios nga kaeabanan sa andang mga nadakpan hay uwa it permit to transport, paso ro rehistro ag may iba pang pag-eabag sa traffic rules and management.
May mando suno kana nga limitado eamang ro mga behikulo nga dapat magbyahe sa mga karsadahon agud nga inde magkriar it traffic.
Ro nasambitang mga impounded nga saeakyan hay gintabok sa mainland Malay kon siin ro mga tag-iya kara hay may multa nga pagabayaran.
