KALIBO, Aklan—Antes pa man ro pag-abot it imahen it Itom nga Nazareno, nataeupangdan eon ro pagkalhit it vendors sa guwa it simbahan sa Barangay Rosario, Malinao nga nagabaligya it mga Black Nazarene souvenirs kapareho it towels, mga imahe, mga kulintas, ag iba pa.
Suno kay Socorro Licanda, sambilog sa mga vendor nga naghalin mismo sa Quiapo, kada nagapalibot ro imahe hay nagasunod sanda rason nga haeos nalibot eon nanda ro Luzon, Visayas ag Mindanao.
Ko domingo nga adlaw sanda nag-abot sa Aklan pinaagi sa roro vessel sakay it andang tapdown.
Raya sigon ro kauna-unahan nga kahigayunan nga naka-agto sanda sa Aklan.
Ro ulihi nga lugar nga andang gin agtunan hay sa probinsiya it Albay.
Para kana, bukon eamang it pagpanaad ro andang gina obra sa Black Nazarene kundi nga kahigayunan man agud nga makaangkon it pangabuhian.
Haeos 100 sigon sanda nga mga vendors nga nagsunod sa Aklan.
Gindugang pa ni Licanda nga gin-mana nana ro nasambit nga business sa anang mga ginikanan bangud nga unga pa eamang hay nagabaligya eon imaw it mga memorabilias it Nazareno sa Quiapo Church.
Ginpaathag pa nana nga unga pa eamang hay deboto eon imaw it Black Nazarene bangud nga anuman nga problema nga naga abot sa anang kabuhi hay ginatugyan nana sa Itom nga Nazareno rason nga bilang baeos hay paga-obrahon nana ro tanan agud nga imaw hay pasidunggan.
