KALIBO, Aklan—Ginahueat pa it mga vendors it Kalibo public market ro memorandum of agreement halin sa lokal nga gobyerno it Kalibo antes nga magsaylo sa gintaeana kanda nga relocation site sa Kalibo Eastern Side Terminal sa San Lorenzo Drive, Barangay Andagao.
Suno kay Rosalia Tampos, presidente it Fish Vendors Association nga magasaylo eamang sanda sa oras nga mabaton ro memorandum of agreement kun sa siin dikara nakabaehag ro andang mga demand sa LGU-Kalibo.
Gusto sigon nanda nga makaangkon it kasiguraduhan nga magiging maayos ro andang pagbalik sa oras nga matapos eon ro construction it bag-ong tindahan.
Dapat suno kana nga mapatuman ro due process ag transparency agud nga maging patas sa tanan.
Ko nagtaliwan nga Agosto 15 hay nagpadaea sanda it letter request sa munisipyo , apang kahapon eamang sanda nakabaton it sabat.
Nauna eon nga ginpahayag it Municipal Economic Enterprise Development Office (MEEDO) Kalibo nga kinahangean eon nga bakantehon it mga vendors ro tindahan sa Setyembre 5 agud nga mataw-an it daean ro modernization project it merkado publiko.
Samtang, uman nga paga-inspeksyunon it mga vendors makaron nga adlaw ro ginpatindog nga mga temporary stalls sa relocation site.
Nasayuran nga gintugyan eon ni Kalibo Mayor Juris Sucro sa MEEDO ro pagresolba sa demand it mga miyembro it Kalibo Public Market United Stall Owners and Vendors Association.
Sa pihak nga parte, ginklaru ni Tampos nga owa sanda nagakontra sa proyekto bangud sa pagpati nga maka-contribute raya sa development it tindahan ag sa banwa it Kalibo sa pangkabilugan.
