KALIBO, Aklan—Nagareklamo eon ro mga vendors sa Kalibo public market bangud nga naghina sigon ro andang kita bangud sa nagsoeputan nga mga sidewalk ag talipapa vendors.
Suno kay Rosalea Tampos, sambilog sa mga nagabaligya sa nasambit nga tindahan nga nakipagpueong eon sanda ko nagtaliwan nga adlaw kay Mayor Emerson Lachica agud nga iplastar ro andang problema.
Kat owa pa sigon tumama ro coronavirus disease ukon COVID-19 hay medyu abu pa ro nagabakae sa tindahan, apang makaron hay nagsangkiri eon bangud nga mas ginapili sigon it mga bumaeakae ro mga nagabaligya sa talipapa ag mga kilid it karsada.
Aminado man sanda nga sambilog sa nagapangunang rason kara hay ro kawad-an it parking area para sa mga nagabakae.
Dugang pa nga nagasunod sanda sa patakaran rason nga pag-abot it alas-5 it hapon hay haeos sarado eon sanda tanan bukon it kapareho sa mga sidewalk ag talipapa vendors nga pagusto sanda sa andang oras.
Masyado eon suno kana nga nagnaba ro andang kita, kun sa siin, mag-eowas sa pwesto hay nagabayad pa sanda it lisensiya ukon permit.
Samtang, ginlaygay man nana sa mga konsumidor nga mas bentaha sa gihapon kon sa merkado publiko sanda magpanindahan bangud nga mag-eowas nga makasigurado sanda nga safe ro mga baligya hay naga-agi pa sa health protocols ro mga nagasueod sa tindahan kapareho it pagbo-oe it body temperature , paghugas it alima ag social distancing rason nga mabahoe ro posibilidad nga makalikaw sa covid infection.
Nagpaandam pa imaw nga kon magapadayun ro makarondaya nga sitwasyon hay may posibilidad nga sa karsada man sanda magabaligya sa ulihi.
Gindugang pa nga takaw aksidente man ro mga sidewalk vendors ag naga-aywan it basura ag ma-eangsa nga hugum sa mga karsdahon ro andang mga baligya.
