KALIBO, Aklan—Nagpanawagan ro Municipal Health Office ukon MHO-Kalibo sa mga ginikanan nga indi anay pagdaehon ro andang mga unga eabi eon ro mga eapsag sa mga matawo nga lugar partikular sa Kalibo Pastrana Park bangud nga nagapabilin ro paeag it COVID-19.
Suno kay Dr. Jocelyn Garcia it MHO-Kalibo nga bangud nga ginapasugtan eon ro pagguwa it mga unga hay kinahangean nga limitahan eamang ro andang oras sa guwa eabi eon kon nagapamasyar sa mga mall.
Umpisa nga ginpaidaeum sa Alert Level 2 ro Aklan hay ginapasugtan eon ro pagguwa it mga menor de edad.
Madumduman nga nauna eon nga ginreport it DOH nga may sangka daywang dag-on nga unga ro nag-positibo sa COVID-19 matapos magpamasyar sa mall idtu sa Metro Manila.
Gindugang pa ni Dr. Garcia nga dapat nga mailikaw ro mga unga sa mga matawong lugar bangud nga posible gihapon sanda nga matapnan it sakit.
Mataas sigon ro paeag it pagtaeapnan sa mga unga bangud nga kaabuan kanda hay owa pa nabakunahan.
Uman pa nana nga ginpadumdum nga padayun nga sundon ro health and safety protocol.
