KALIBO, Aklan—Nakalista ro Municipal Health Office (MHO)-Kalibo it kapin sa 205 nga aktibong kaso it COVID-19.
Raya hay matapos nga madugangan it 22 nga bag-ong nagpositibo sa sakit makaron nga adlaw.
Sa ginpatigayun nga session it Sangguniang Bayan, gin-report ni Dr. Jocelyn Garcia ro top 3 barangay nga may mataas nga COVID-19 cases.
Ginapangunahan raya it Brgy. Poblacion nga may 50 aktibong kaso kung siin ginasundan raya it Andagao nga may 44 ag Estancia nga may 20 nga active cases.
Sa pihak kara, may daywang ka mga barangay pa suno kana nga owa it naireport nga kaso partikular ro Brgy. Caano ag Nalook.
Kaabuan sa mga pasyente hay nakaangkon eamang it mild symptoms ag maisot nga porsyento eamang ro admitted sa ospital.
Ginpasiguro ni Dr. Garcia nga ginapahauman eon nanda ro uman nga surge it impeksyon kung siin naghire eon ro lokal nga gobyerno dugang nga daywa ka mga contact tracers.
Sambilog pa sa ginataw-an nanda makaron it atensyon hay ro bastante nga suplay it bueong.
Raya hay matapos nga magkaubusan it flu medicine sa mga botika sa pilang lugar sa nasyon.
