KALIBO, Akan–Nagpanawagan si Dr. Daystar Sedillo, Municipal Health Officer it banwa it New Washington sa publiko nga doblehon pa ro pagdahan makaron nga nakasueod eon sa Aklan ro beta ag P variant it covid 19.
Suno kana nga eubus nga kinahangean makaron nga magpakita it kooperasyon ag disiplina ro mga pumueuyu agud nga masuk-ean it deadly virus.
Importante suno kana ro hugut nga pagsunod sa minimum health standards kamana man ro insigidang pag-isolate kon makabatyag it mga sintomas it sakit.
Gindugang pa kara nga base sa mga pagtuon, mas mataas ro tsansang maka-eowas sa COVID 19 ag iba pang mutation it sakit kon fully vaccinated eon.
Ro problema eamang sigon makaron hay ro supply it covid vaccine nga naga abot sa andang banwa.
Mag-eowas sa COVID-19, dapat man sigon nga magbantay sa maabung sakit makaron nga tag-uean.
Gin-engganyo man ni Dr. Sedillo ro publiko nga kon gina eagnat ag may iba pang nabatyagan, magpakonsulta eagi sa doktor imbes nga mag-self medicate.
