Naging dukot ag makahawat-hawat ro naging hampang it Miami Heat ag Boston Celtics sa kakatapos eamang nga Eastern Conference Finals sa nagapadayon nga 2023 NBA playoffs.
Nagtapos ro hampang sa score nga 103-84 pabor sa Heat.
Suno kay Jocel Rata, sangka Sports Analyst, makabig nga mahinay ro development it koponan nga Boston Celtics umpisa ko nagtaliwan nga season bangud owa raya it ginpakita nga bag-ong taktika.
Suno pa kay Rata nga umpisa paeang it pagsambuwa it daywang koponan hay dominado eon it Heat ro hampang rason nga owa it duda ro pagkakuhit kara sa kadaeag-an.
Ginpakita sigon it Heat ro pagkapreparado kara sa hampang ag ginpamatud-an nga nagakadapat eamang sanda nga makasueod sa finals.
Angot kara, gintapos ni Jimmy Butler ro hampang sa pag-angkon kara it 28 points sa bulig man ni Caleb Martin nga may 26 points.
Ro Heat hay naboue ro kadaeag-an sa unang tatlong serye it hampang antes naeagas it Celtics sa three-straight win rason nga umabot pa sa Game 7.
Ginasugid nga ro kadaeag-an it Heat hay makabig nga pagbaeos para sa Erik Spoelstra-squad bangud sanda hay ginpiyerdi it Boston ko nagtaliwan nga season sa sueod man it pitong hampang.
Sa pihak nga parte, makasambuwa it Miami Heat ro Denver Nuggets sa sueod it best-of-seven finals sa adlaw it Biyernes.
