Kalibo Aklan —– Kasunod it sigidas nga pagtinaas it kaso it mga natamaan it 2019 coronavirus infectious disease ukon COVID-19 sa nasyong Italy, gulpi nga naghawan ro dati nga masako ag puno it tawo nga syudad it Milan.
Suno kay Bombo International Correspondent Armie Esparcia-Delos Santos, tubong Brgy. Mataphao, New Washington apang presenteng nagatrabaho sa Milan, Italy nga sarado eon ro mga eskwelahan, restaurants ag disco bar.
Suno kana, pahirapan ro pagpamakae it grocery partikular it para sa personal hygiene nga ginakaeakipan it alchol, hand sanitizer ag face mask.
Kon magsueod suno kana sa mga baligyaan makaron hay kinahang-ean nga lima-lima eamang ag ro mga nagapili hay kinahang-ean nga nakaantad it sang metro.
Raya sigon ro andang pamaagi agud nga inde makaangkon it personal contact sa mga nakakahalubilo nga tawo.
Ginpahayag dugang nga naalarma eon sigon ro gobyerno it Lombardy bangud nga inde pa nanda sa makaron makontrol ro sitwasyon rason nga gineaygayan ro mga pumueoyo nga ipabilin ro malimpyo nga pang-eawason, permi magsuksok it facemask, maggamit it alcohol ukon hand sanitizer kamana man pabaskugon ro immune system.
Samtang, sa pihak it ginpatuman nga lockdown sa nasambitang nasyon, ginakabaeak-an ni Delos Santos nga base inde imaw makauli agud nga mag-atendir it graduation it anang onga.
