Ginreport it Department of Labor and Employment (DOLE) nga magataas it masobra P30 ro daily minimum wage sa Region 4-B ag Region 12 matapos aprubahan it tagsa-tagsa nga Regional Tripartite Wages and Productivity Board ro petisyon it wage hike it mga labor groups.
Ginpahayag ni Rolly Francia, director it DOLE’s Information and Public Service Division, nga P35 ro gindugang sa daily minimum wage it mga empleyado sa Region 4-B nga nagasakop sa mga probinsya it Occidental ag Oriental Mindoro, Marinduque, Romblon ag Palawan.
Sa Rehiyon 12 nga may sakop sa mga probinsya it South Cotabato, Cotabato, Sultan Kudarat, Sarangani ag siyudad it General Santos, gin-aprubahan it Regional Tripartite Wages and Productivity Board kara ro P32 nga pagtaas sa pang adlaw-adlaw nga minimum wage it mga empleyado.
Ro pagtaas it sweldo sa daywang ka mga rehiyon hay magiging epektibo pagkatapos it pag-apruba it National Tripartite Wages and Productivity Board ag 15 adlaw pagkatapos it opisyal nga pagpaathag it impormasyon.
