National News———Nagapati si Labor Secretary Silvestre Bello III nga posibleng indi eun mag-insakto pa ro minimum wage sa National Capital Region (NCR) para sa mga trabahador ag sa andang pamilya bangud sa mahae nga presyo it mga produktong petrolyo ag iba pang baeak-eon.
Ginkumpara eamang ni Bello ro presenteng daily minimum wage sa National Capital Region nga kapin sa P537 nga bukon sigon it insakto para sa presyo it mga nagapangunang baeak-eon kapareho it pagkaon imaw man sa iba pang gaeastuson sa bill it kuryente ag tubi.
Sa sangka statement, ginmanduan kara ro Regional Tripartite Wages and Productivity Boards (RTWPB) sa bilog nga kalibuatan nga paspasan ro pag-review sa minimum wages.
Kumpiyansa ro Labor chief nga maisumite it board ro andang rekomendasyon antes nga matapos ro buean it Abril.
Aminado man raya nga mabahoe nga paeag ro pagtaeana ukon adjustment it nagakaigo nga minimum wage rason nga importante ro pagbalanse kara.
Nauna eun nga nakabatun it mga petisyon ro RTWPB angot sa minimum wage increase, sambilog kara ro panawagang makaangkon it ginatawag nga uniform increase it P750 bilang minimum wage sa bilog nga nasyon.
