Padayon ro pagbuhos makaron it pagtamyaw sa Philippine women’s national team matapos nga umabante sa igapatigayon nga finals hin-aga sa prestihiyosong 2022 AFF Women’s Championship.
Bukon eamang it mga Pinoy fans ro nagpabot it pagtamyaw kundi maging maghalin sa pilang top sports officials it nasyon.
Suno kay Philippine Football Federation president Mariano “Nonong” Araneta, gintawag nanda nga “miracle in Manila” ro natabo tag mapiyerde ro dating kampeon nga Vietnam team sa score nga 4-0.
Pag-amin man ni Araneta nga hasta sa makaron hay indi pa imaw makapati sa ginpakita nga hampang it mga Pinay ag tinambakan pa ro Vietnamese team.
Samtang, nagapati man ro presidente it football federation nga mabahoe nga bulig ro international exposures it mga players para mas maging mayad pa ro mga raya sa hampang.
