KALIBO, Aklan–Kasunod it nagahilapit nga semana santa, maabo ro mga aktibidad nga ginahimo it simbahang katolika agud nga dumdumon ro mga kasakit ni Hesus sa pagtubos sa kasae-anan it katawuhan sa ibabaw it kalibutan.
Angot kara, ginpahayag ni Bombo International Correspondent Girlie Ongoco it Rome, Italy nga ginabantayan nanda ro igapatigayon nga misa ni Pope Francis sa Vatican City.
Ro adlaw it Biyernes sa nasambit nga nasyon hay ginakabig nga ordinaryong adlaw bukon it kaparehas sa Pilipinas nga holiday raya.
Ro holiday suno kay Ongoco sa Italy hay adlaw it Lunes ukon ginakabig nga little easter bangud nga sa raya nga kahigayunan nagatililipon ro bilog nga pamilya.
Ginakabig sigon raya nga rest day ag ginabuoe man nanda raya nga kahigayunan agud nga mabisita ro andang mga himata ag makaibahan sa sangkiri nga saeo-saeo bilang family bonding.
