KALIBO, Aklan—Agud nga matapna ro mas pang pagkalhit it coronavirus disease ukon covid 19, ginkasugtanan it lokal nga gobyerno it Malay ag simbahan nga obrahon eamang nga virtual ro mga pagapatigayunon nga misa sa Holy Rosary Parish sa barangay Balabag sa selebrasyon it semana santa.
Suno kay Malay mayor Frolibar Bautista nga kanselado man ro mga misa ag iba pang aktibidad sa mga chapel it Brgy. Manocmanoc.
Ginapasugtan sigon ro misa sa barangay Yapak ag mainland Malay bangud nga owa man it problema sa nasambit nga mga lugar, apang 30% eamang it seating capacity it simbahan ro ginapasugtan kaibahan ro andang mga lectors, commentators, choirs, ag eucharistic ministers sa Huwebes Santo, Biyernes Santo, Sabado de Gloria ag Domingo it pagkabanhaw.
Gindugang pa kara nga ro may mga ginabuytan eamang nga stubs ro ginapasugtan nga makasueod.
Bilang alternatibo, makaangkon it live streaming sa mga misa it LGU Malay page , PCTV page ag Community Channel.
