Sangka babaye sa US nga nagsueat it libro angot sa pagkamatay it anang asawa ro gin-aresto matapos mabisto nga imaw ro naghilo kara.
Ko Marso 2022, nagtawag sa emergency hotline si Kouri Richins para magpangayo it bulig bangud nga owa eon nabugtaw ag maeamig eon nga bangkay ro anang mister nga si Eric Richins.
Ro rason it pagkamatay it mister hay fentanyl overdose.
Sa autopsy report nga ginpatigayon kay Eric, may nakit-an nga mataas nga dosage it fentanyl sa anang eawas.
Sa imbestigasyon it mga pulis sa cell phone it suspek, may mga text message raya nga ginpadaea sa sangka drug dealer sa katung-anan it mga petsang Disyembre 2021 ag Pebrero 2022.
Sa mga text, mabasa nga nag order imaw it prescription pain medication nga Hydrocodone pills.
Tatlong adlaw matapos mabaton ro Hydrocodone pills, nag-celebrate it Valentine’s Day ro mag-asawa.
Matapos ro Valentine’s dinner, naospital si Eric.
Samtang sa ospital, nag hinangae ro mister sa sangka amigo nga sa tan-aw nana hay ginhiluan imaw it anang misis.
Daywang domingo matapos maospital, nag order ro misis sa anang drug dealer it fentanyl
Marso 4, 2022 nagtawag sa 911 hotline si Kouri ag ginhambae nga owa eon nabugtaw ro anang mister.
Nasayuran nga ro ginhalinan it owa pagka-ilintindihan it mag-asawa hay isyung may kahilabtanan sa kwarta.
Antes nga mabuking ag ginpasakaan it kaso sa gin obra nga krimen, nagpaguwa pa it libro si Kouri nga may titulong, “Are With Me?”, sangka children’s book nga nagaturo sa pamatan-on kun paalin nga batunon ro pagkaduea it sangka mahae sa kabuhi.
Ko nagtaliwan nga buean nakaangkon pa it TV guesting si Kouri para ipromote ro libro sa sangka talk show kun sa siin ginpahayag nana nga ginsueat nana ro libro para sa anang asawa.
