KALIBO, Aklan—Nakasueod sa Top 10 Finalist para sa Top Model competition it Miss World Philippines 2021 ro pambato it probinsya it Aklan nga si Miss Kathleen Paton sa ginpatigayon nga Gala Charity Night ko July 22, 2021 sa Grand Ballroom, Okada, Manila.
Nasayuran nga ro magadaog sa Top Model Fast track event hay otomatiko nga makasueod sa semifinalist it Coronation Night it Miss World Philippines 2021.
Madumduman nga si Ms. Paton ro ginkoronahan bilang Miss Teen International 2017 ag naangkon pa ro Miss Teen Charming special award sa ginpatigayon nga international beauty pageant sa Bangkok, Thailand ko Setyembre 23, 2017.
Mag-eowas kara, ginkoronahan man imaw bilang Miss Manila 2018 sa Philippine International Convention Center ko June 26, 2018.
Si Paton nga Manila city’s ambassadress hay naangkon man ro Best in Swimsuit sa nasambit nga beauty pagaent ag nag-uli it cash prize nga P1-million pesos.
Ro Filipina-Australian beauty hay onga nanday Roy Paton, sangka Australian national ag Luz Sinag Paton it Brgy. Laserna, Nabas, Aklan.
