KALIBO, Aklan–Padayun ro imbestigasyon it mga otoridad sa pagbigti it sangka 34-anyos nga eaeaki nga gina-alegar nga gin-away it anang misis kabi-i sa boundary it Barangay Pook ag Andagao, Kalibo.
Nakit-an nga nakabigti bandang alas 7:00 kaina it agahon sa sueod it sangka talyer sa ginatrabahuhan nga poultry supply ro biktimang nakilaeang si Ramil Zonio, tubong Libacao, apang presenteng naga-istar sa nasambit nga lugar.
Si Zonio hay nagatrabaho bilang delivery driver.
Base sa pahayag ni Jinky Zonio, misis it biktima nga kabi-i antes nga natabu ro insidente hay nag-away sanda it anang asawa bangud sa pirme kara nga pag-inom it aeak.
Owa sigon raya naka-uli rason nga nag-agto sa anang gina-obrahan kaina it agahon ag nagpangutana sa anang katrabaho.
Gin-usoy nanda raya hasta nga nakita ro nakabigti nga bangkay it biktima sa sueod it talyer it sambilog sa andang mekaniko.
Ro biktima hay may sambilog nga unga nga naga-edad pa eamang it limang dag-on.
Sa pihak nga parte, naging emosyunal man si Mary Ann Salvador, magueang it biktima sa gindangatan it anang manghud.
Suno kana nga indi nana maintindihan kon ham-an nga nahimo it anang manghud nga wakasan ro anang kabuhi sa maisot eamang nga away nanda nga mag-asawa.
Mabuot sigon ro anang manghud rason nga owa sanda it nasayuran nga may naging kaaway imaw.
Maskin ro anang amo ag mga katrabaho hay nakibot man sa insidente.
