POLICE Report — Patay ro sangka 62-anyos nga mister matapos nga eampusan it dumbbell it anang retiradong manugturo nga misis nga gina-alegar nga may diperensiya sa paminsaron samtang hamuok nga nagakatueog sa sueod it andang baeay sa Zarraga, Iloilo.
Dead-on-the-spot ro biktima nga sangka engineer samtang ginsurender sa kapulisan it anang mga kaigbataan ro 59 anyos nga misis, parehong residente it Ilawod Poblacion, Zarraga, Iloilo.
Base sa report it Zarraga Municipal Police Station, hapon ko Lunes samtang nagakatueog sa sofa ro biktima kat gulpi raya nga eampusan sa ueo it dumbbell it suspek.
Sa pagresponde it mga awtoridad, nakita ro biktima nga nagapaligos sa anang kaugalingon nga dugo ag owa eon it kabuhi.
Ginasugid nga dating manugturo ro suspek ag temprano nga nagretiro sa serbisyo bangud sa sakit sa paminsaron.
Bago ro krimen, pilang adlaw eon sigon nga owa nagakaon ro biktima ag posibleng inatake it anang sakit sa paminsaron.
Ginsaysay man it mga kaeapitbaeay it mag-asawa, eubus sanda nga nakibot sa natabu bangud nga nakikita man nanda nga matam-is ro pagmaeahaean it mag-asawa kun sa siin indi sigon makakaon ro sambilog sa mga raya kon indi magkaon ro sambilog.
Owa man it plano nga magpasaka it kaso ro pamilya it biktima kontra sa suspek.
