KALIBO, Aklan — Padayon nga ginabueong sa ospital ro sangka miyembro it demolition team matapos nga makuryente samtang nagaguba it istraktura sa Laketown area sa Isla it Boracay.
Ginkilaea ro biktimang si Arnold Padayao, 40, residente it Sitio Tulubhan, Barangay Manoc-Manoc, Boracay ag presenteng nagatrabaho sa idaeom it Aklan Provincial Engineering Office (PEO).
Suno sa andang headman nga si Roy Malihan, nagahukas sigon it yero ro biktima kat gulpi eon lang nga nagdikit sa live wire ro ginabuytan kara nga bara.
Nakabati sigon it mabaskog nga pag-eopok ro anang mga kaibahan apang uwa sigon nanda raya pag-intindiha sa pag-eaum nga halin eamang raya sa bag-ong kabit nga linya it kuryente.
Mabuhay pa sigon antes nanda nakit-an ro biktima kon siin gilayon raya nga gindaea sa Ciriaco S. Tirol Memorial Hospital sa Isla agud maeapatan it paunang medikasyon.
Apang, bangud sa anang maselan nga kondisyon hay gin-eaygayan raya nga isaylo sa sangka ospital sa banwa it Kalibo kon siin imaw sa makaron padayon nga ginabueong.
Nasayuran nga nagapadayon gihapon ro demolisyon sa Isla it Boracay agud makaeagas sa Boracay reopening sa Oktubre 26.
