Kalibo Aklan ———–Namatay ro sangka miyembro it New People’s Army ukon NPA sa tunga it pakikipag-engkwentro sa mga tawuhan it Armed Forces of the Philippines (AFP) sa Sitio Maytaraw, Brgy. Dalagsaan, Libacao ko nagtaliwan nga adlaw it Biyernes, Abril 1.
Suno kay BGen. Marion Sison, Commander 301BDE,3ID,PA nga hasta makarun hay padayun pa nga gina-imbestigahan ro matood nga pagkatawo it namatay nga miyembro it NPA, apang raya hay insiyal nga ginakilea nanda kay ‘KA Minang’ ukon si Ms. Genalina Giganto it Brgy.Lahog, Tapaz, Capiz .
Suno pa kay BGen. Sison, nauna nga nag-imporma kanda ro mga pomoeuyo sa nasambitan nga lugar angot sa nasip-eatan nga presensiya it mga NPA.
Bangud kara hay nagpadueong sigon ro mga tropa sa lugar kun sa siin naka-engkwentro nanda ro sangka squad it NPA.
Kahapon kat ginpapanaog sigon nanda ro cadaver ni ‘KA Minang’ ag ginturn-over sa LGU it Capiz agud mataw-an it maayos nga pag-eubong.
Samtang, padayun man sigon nga nakamanman ro andang tropa agud bantayan ro lugar.
Ginapasiguro pa kara nga ro Philippine Army hay indi mag-ungkat sa andang operasyon mintras may naga-aligid nga NPA.
Nasayuran nga maghalin sa Capiz ro mga nasambitan nga NPA , apang kat owa eun it may ginabatun nga suporta idto hay naisipan it mga raya nga magpadueong sa banwa it Libacao partikular sa Brgy. Dalagsaan nga imaw ro boundary it Aklan ag Capiz.
Sa pihak parte, nagpanawagan man si BGen. Marion Sison, sa mga CPP-NPA nga magsurender eun lang ag magbalik-loob sa gobyerno agud nga malikawan eun ro waea tuo nga engkwentro sa tunga it magtimbang nga parte.
Ginpasiguro man kara nga haom ro Philippine army ag National Task Force to End Local Communist Armed Conflict (NTF-ELCAC) agud nga buligan sanda nga mataw-an it maayos nga pagpangabuhi ag opurtunidad nga makaibahan ro andang pamilya.
Kan-o eamang hay may kapin sa 41 sigon nga mga rebelde ro nagsurender sa tropa.
Bangud kara hay naga-abot eun sigon it masobra 100 mga NPA ro nagbalik-loob sa gobyerno ag uman nga nagapangabuhi it maayos.
