Kalibo Aklan ——–Gin-engganyo it pamunuan it Metro Kalibo Water District (MKWD) ro mga residente it Brgy. Estancia ag Tinigao Kalibo nga nagareklamo sa maeubog ag mahina nga supply it tubi nga nagaguwa sa andang gripo nga magdangop sa andang taeatapan .
Suno kay Engr. Lydio Ureta, General Manager it MKWD nga tuyo kara nga insigidang mataw-an it aksyon ro andang reklamo eabi pa ag maeapit eamang ro mga raya sa andang pumping stations.
Makabig sigon raya nga isolated case ag posibleng nakaangkon eamang it problema sa andang linya.
Reklamo it mga residente nga kada agahon, kaeabanan nga sangkiri eamang ro nagaguwa nga tubi halin sa mga gripo ag kon may nagatueo man, maeubog ukon mahigku .
Ginpasiguro ni Engr. Ureta nga magapatigayon sanda it imbestigasyon agud nga matumod ro posibleng kabangdanan .
Kaeabanan suno kana nga flushing ro andang ginahimo kon makaangkon it maeubog nga tubi bangud nga owa pa sanda it water treatment plant.
Ro anda sigon nga water source hay nagahalin ground water nga makabig nga maabu nga minerals nga naga-contribute sa turbidity ukon pag-eubog it tubi .
Samtang, bangud nga nakalista eon it kauna-unahan nga kaso it local transmission , ginpahayag ni Engr. Ureta nga mas pang ginhugtan makaron ro pagpatuman it minimum health standard partikular ro pagsuksok it face shield ag face mask it andang mga empleyado ag mga kliyente.
