KALIBO, Aklan—Ginpaathag it Metro Kalibo Water District ukon MKWD ro naging rason sa likod it pag-angkon it maeobog ag mapuea nga kulay it tubi nga naeksperyensyahan it mga miyembro konsumidor ko adlaw it Sabado ag Dominggo.
Suno kay Engr. Frederick Buenavidez, tagapaghambae it MKWD nga ro source it andang operasyon hay halin sa ground water ukon may deep well kon sa siin ginakaeakipan raya it iron and manganese minerals nga kon gina-treat it chlorine hay normal eamang nga may mga particles nga kulay puea ukon orange.
Raya man sigon ro rason nga may mga ginapatigayon nga flushing bangud nga kon anu ro ginapasueod sa tubo ukon linya it tubi hay maduea manlang kon ginapaguwa.
Ginaabisuhan man ro mga miyembro-konsumidor nga magpatigayon it flushing kon may maeksperyensyahan nga makarundaya nga klase it tubi nga nagaguwa sa andang mga gripo ag mag-imporma eamang sa andang taeatapan.
