Kalibo Aklan ———Temporaryong ginsarado ro taeatapan it Metro Kalibo Water District sa Jaime Cardinal Sin Avenue, Andagao, Kalibo matapos nga magpositibo sa COVID 19 ro 27 nanda nga mga empleyado.
Suno kay Engr. Lydio Ureta, OIC general manager it MKWD nga sa nasambit nga numero , 15 pa ro nagapabilin nga aktibong kaso ukon padayun pa nga nagapamayad.
Tanan sigon nanda nga opisina it taeatapan hay sarado ag nakataeanang magabukas sa Lunes, Agosto 23 mag-eowas ro pagbayad it bills.
Ginlaygayan pa ni engr ureta ro mga konsumidor nga kon mahimo hay indi anay mag-agto sa andang taeatapan ag ipa-agi ro transaction online eabi eon ro may mga account sa landbank ukon sa andang mga payment partner.
Ro mga may due date umpisa Agosto 13 hasta 25 hay indi pagasukton it penalty.
Madumduman nga ko Biyernes, Agosto 13 hay gin-umpisahan ro pagsarado it bilog nga main building it MKWD agud nga mataw-an it daean ro paglimpyo ag disinfection.
Sa pihak nga parte, gindugang pa ni Engr. Ureta nga maskin nga naka-work from home, ro management it MKWD, eakip ro mga opisina nga nagapatigayon it frontline services ag sa field nga nagatau it importante serbisyo hay padayun nga nagabaton it internal ag essential transactions nga nagakinahangean it insigidang aksyon ag atensyon agud nga indi maapektuhan ro importanteng operasyon.
