KALIBO, Aklan—Ginpirmahan eon ro Memorandum of Agreement (MOA) sa tunga ni Kalibo Mayor Emerson Lachica ag Kalibo Sr. Sto. Niño Ati-Atihan Management Council, Inc. (Kassamaco) para sa pagdumaea ag operasyon sa nagahilapit nga Kalibo Ati-Atihan festival 2020.
Raya hay kasunod it pagtau it “go signal” it Sangguniang Bayan it Kalibo kay Mayor Lachica sa ginpatigayon nga special session ko adlaw it Miyerkules.
Nauna eon nga ginkumpirma sa Bombo Radyo Kalibo ni Municipal Treasurer Rey Villaruel nga kapin sa P16 million ro pondo nga ginpaguwa it lokal nga gobyerno it Kalibo para sa premyo, subsidiya para sa mga tribu ag grupo ag iba pang gaeastuson kamana man sa security para sa kaeowasan it publiko sa kabilugan it festival.
Makaron nga selyado eon ro MOA, pwede eon sigon nga maka-umpisa sa pag-solicit it pondo halin sa mga sponsors ro Kassamaco nga may 75-25 nga sharing.
Buot hambaeon nga 75 porsiyento it pagakitaon sa selebrasyon hay maagto sa general fund it munisipyo ag ro nabilin nga 25 porsiyento hay sa festival organizer.
Nasayuran nga si Editha Ureta Reyes eon ro bag-ong chairman it Kassamaco kabaylo it nag-resign nga si Apolonio Zaraspe III samtang si vice president for external affairs Rex Maquinto ro events director.
Sa idaeum it MOA, nakatuka sa festival organizer ro promotion, management ag marketing it Kalibo festival 2020 sandig sa ordinansa ag regulasyon it LGU-Kalibo.
Ro MOA hay magabuhay it sang dag-on, kun sa siin, sa pagtapos kara hay obligado ro festival organizer nga i-turn-over ro tanan nga pondo ag propiyedad sa munisipyo.
Required man sanda nga mag-sumite it financial report 60 diyas pagkatapos it festival.
