Daywang piloto it Philippine Air Force (PAF) ro nagbuwis it kabuhi matapos nga bumagbag ro andang eroplano sa kaeanasan sa Bataan ko nagtaliwan nga domingo.
Ro mga piloto hay nakilaeang sanday Captains Ian Gerru Pasinos ag Jhon Paulo Aviso nga ginasugid nga mga mayad nga piloto.
Suno kay Col. Ma. Consuelo Castillo, tagapaghambae it PAF, pabalik eon sa andang base ro eroplano kat matabu ro aksidente.
Ro PAF hay may ap-at nga SF260 plane nga ginbakae ko 1990.
Bangud sa aksidente, ro tatlong nabilin nga eroplano hay indi eon pagapasugtan nga mag-eupad.
Kaibahan ro daywang piloto sa mga nakipag-away sa Maute group sa Marawi ko 2017.
Nakipag-away man ro daywa sa mga teroristang Abu Sayyaf sa Bohol ko 2017 ag sa sangka operasyon kontra sa mga terorista sa Lanao del Sur it kaparehong dag-on.
Maeapad ro experiensiya nanday Pasinos ag Aviso sa pagpaeupad it SF260 rason nga maabu ro nangawa kon ham-an raya hay bumagbag.
Ginasugid nga owa it ejection mechanism ro SF260.
Kaeabanan nga kon may gulpiyadang kinahangeanon hay naga-parachute ro piloto it SF260 apang owa raya naobra it daywang piloto bangud sa kawad-an it nasambit nga mekanismo.
Nagakabagay eamang ro desisyon nga indi eon pagpaeuparon pa ro mga nabilin nga SF260 planes.
Kun owa it ejection mechanism, medyu nakikipagsugae ro mga pilotong magagamit kara.
Indi eon dapat nga dugangan ro mauyang nga kabuhi bangud sa kakueangan it mekanismo.
Maging prayoridad it PAF ro pagmodernisa sa andang linya.
Sa tanan nga sanga it Armed Forces of the Philippines (AFP), ro PAF ro medyu naaywan.
Tinguhaan nga makaangkon it mga bag-ong eroplano agud nga indi eon mauman ro natabu sa SF260.
